Glasibe

– biribe bašo Evropikano parlamenti ko puranokurko 9-to juni 2024

Koj šaj te glasinel?

Tut isi glasibaskoro pravo te sian švedikano dizari (gradžani), te isi tut pherde 18 berša najkasno ko biribaskoro dive thaj te sian ja pale te sian sine registririm/o/i ki Švedija.

O Švedikane dizarija soj registririme ki Švedija ola ovena čhivde automatikane ki glasibaskiri lista. Te sian registririmo avri e phuvjatar tegani trebela te prijavine tut bašo glasibaskiri lista sakova dešto berš. Okova dženo so na sine registririmo ki Švedija nane e džene glasibaskoro pravo.

Tut isi glasibaskoro pravo thaj te sian dizari ki disavi javer phuv ki EU, te sian registririmo ki Švedija thaj te prijavindžan tut ki glasibaskiri lista. Tu prijavinea tut ko länsstyrelsen (provincijakoro ingaribe) 30 dive angleder o biribaskoro dive.

Tu so isi tut glasibaskoro pravo tuke ka avel glasibaskiri karta poštaja. Ki glasibaskiri karta isi informacija bašo tlo glasibaskoro pravo thajkori šaj te glasine. Te našadžan tli glasibaskiri karta šaj te poručine nevi.

Adžahar glasinea

Tlo biribe tano garavdo thajtu na trebela te vakere džiksake kaske tu glasindžan.

E biribaskere listia isi ko sa o thana kori so šaj te glasine. Ko biribe bašo Evropikano parlamenti o listija tane parne. Keda glasinea tu čhivea tlo biribaskoro listo ko jek kuferti.

Keda ka glasine trebela te sikave tli identifiribaskoro dokunenti. Te nane tut identifiribaskoro dokumenti tegani šaj jek javer dženo te svedočinel bašo tlo identiteti, tegani trebela odole džene te ovel identifiribaskoro dokumenti.

Glasibe upri partija

Tu glasineja upri jek partija. E partijakoro anav terdžola ko biribaskoro listo. Te našti te arakhe tle partijakoro biribaskoro listo tegani šaj te pišine e partijakoro anav ko čučo biribaskoro listo.

Glasibe upri partija thaj dženo

Te mangljan te ovel birimo disavo specijalno partijakoro kandidati, tegani ka čhive jek nišani bašo odova kandidati. Tu šaj te glasine jekhe dženeske odolea so čhivea ko čučo biribaskoro listo e partijakoro anav thaje kandidadeskoro anav.

Anglederglasibe ki tli komuna ja pale ki javer komuna

Isi lokalija bašo anglederglasibe. Tu šaj te glasine ko bilo savo lokali bašo anglederglasibe ki sa i phuv. O Anglederglasibe lela te ovel ko 22 maj thaj kerela pe sa dži ko 9 juni. Keda ka dža ko anglederglasibe mora te ovel tut tuja tli glasibaskiri karta, te našaldžan ola šaj te le jek nevi.

Glasin ko tlo biribaskoro lokali ko biribaskro dive ko 9-to juni

Sa o manuša so birinena ola preperena ko jek biribaskoro lokali. E biribaskoro lokali tano phravdo samo ko biribaskoro dive. Tu šaj te glasine ko biribaskoro lokali so terdžola ki tli glasibaskiri karta.

Glasibe avri e phuvjatar

Te bešea džigde avri e phuvjatar ja pale te sian avri e phuvjatar tegani šaj te glasine bičhalindor lil ja pale šaj te kere anglederglasibe ko but švedikane ambasade thaj konzulatija. Kaj te šaj te glasine bičhalindor lil tegani trebela te poručine jek specijalno matrijali. Ka trebel tuke thaj duj svedokija so isi olen pherde 18 berša. O glasibe šaj bičhalela pe kotar o avrunephuvja najrano ko 25 aprili. Tu šaj te anglederglasine ko ambasade ja pale ko konzulatija najrano ko 16 maj.

Glasibe kurireja

Tu šaj te glasine kurireja te našti te glasine odoleske so isi tut nasvalipe, funkciniribaskoro čhinavibe ja pale kotar o phuripe thaj našti džaja korkori ko biribaskoro lokali ja pale ko lokali bašo anglederglasibe. Tegani trebela te poručine jek specijalno matrijali. O glasibe šaj kerela pe najrano ko 16 maj a najkasno ko 9 juni.
Ka trebel tut jek kuriri thaj jek svedoko. Soldujen trebela te ovel pherde 18 berša thaj našti jek dženo te ovel kuriri thaj svedoko. O kuriri te mukhlja tlo glaso ko jek lokali bašo anglederglasibe tegani ka trebel ole/ola te lel peja tli glasibaskiri karta.

Tu šaj te glasine kurireja te sian lindo ko pritvor ja pale ko kriminalengoro phanlipe. Plus odova te sian džigde trujal gavutnikane poštakiri liniaja tegani šaj te glasine e poštareskere pomočeja.

Ko šaj te ovel kuriri?

E kurire mora te ovel najhari 18 berša. O kuriri šaj te ovel:

• Džiko tari familija
• Okova so arakhela tut ja pale džiko so obično pomožinela tut tle bučencar
• Jek so kerela buti ko pritvo ja pale ko kriminalengoro phanlipe
• Gavutnikano poštari, te bešeja trujal gavutnikane poštakiri linija.

Phirutno (ambulirimo) glasengorolejbe

Phirutno glasengorolejbe tano tuke so kotar nasvalipe, phuripe ja pale funkciniribaskoro čhinavibe našti korkori te kere anglederglasibe ja pale te glasine ko biribaskoro lokali. Ko phirutno glasengorolejbe, tli komuna kerela te šaj te aven duj glasengerelearija, ola avena khere thaj lena tlo glasibe. Baši buteder informacija kontaktirin tle komuna

Pučiba?

Mangea te poručine matrijali, nevi glsaibaskiri karta ja pale te isi tut pučiba bašo odova kori thaj sar šaj te glasine? Kontaktirin e komunakere biribaskere komisija, dža ko www.val.se ja pale telefonirin ko Biribaskoro informiribe ko telefoni 020-825 825 (kotar i Švedija) ja pale +46 (0) 771 270 999 (avri e phuvjatar).