Published: 10 March 2023

Lyijesko diiniba aro auriako themmenna

Saare doola koonen aaĥĥena aro auriako themme kajo velkibosko ta lyijengo diinibosko diives hin vojiba te den lengo lyiji are doola stedi so auriako themmengo tšenstabongiire hin phirate lyijengo diinibiako stedi.

Lyijengo diiniba aro auriako themmesko tšenstabongiirengo stedi

Velkibosko tšenstabongiire dömmila, paale Auriakosaakengo Ministeriosko alsiba, save auriako themmengo sveittika tšenstabongiire lena lyijengo arre liinibosko horttiba. Lyjijengo diiniba byryla 24 diives sikide tšatšo velkibiako diives ta douva džala anglal aro varekaj thaane bi gutitiija. Lyijako diiniba hin mostiba te agures aja siiges naalide velkibiako diives, te diino lyiji hin tiija te aaves biĥime aro Velkibosko Tšenstabongiirenge sistunes iek diives anglal velkibosko diives. Saare lyiji are auriako themmenna aavena biĥime Velkibosko Tšenstabongiirenge, koonen dikkena doola ta biĥavena doola fram dola stedengo velkibosko skokkenge kai lyiji ĥunjula.

Liinjako lyijengo diiniba auriako themmenna

Doola koonen aaĥĥena lyijako diinibongiire ta džiivena/buuruvena aro auriako themme hin voijime te den lengo lyiji liinjales are dola themmenna kai joon aaĥĥena. Ĥyönosko džeene are panjako beere koonen aaĥĥena aro auriako themme hin vojime te den lengo lyiji liinjales džeinom postos.

Liinjalo lyijengo diiniba džeinom postos hin vojime te tšeeres koni siiges 45 diives sigide velkibosko diives. Liinjalo lyijesko diiniba naa na aaĥĥela vojime aro Sveittiko themmeatta.

Doori hin hyövime froolaagime materiaale jakkes te liinjalo postosko lyjiesko diiniba aavela vojime. Dauva materiaalos hin vojime te biĥaves Velkibosko Tšenstakiirenna elle auriako saakengo tšenstakiirenna. Liinjalo lyiji hin hyövime aulo biĥime auriako themmenna tšatšo tiijaha aro lyijengo reekniba.