Ette äänestää preivilä

Pyhänä 9 kesäkuuta 2024 oon vaali Eurooppaparlamenthiin Ruottissa.

Näin sie tehet

1. Valmista sinun ääni yksinhäisesti. Tyihhään vaaliseetelhiin sie kirjotat sen parttion nimen jotako sie halvaat äänestää. Sie saatat kansa henkilöäänestää kirjottamalla parttionimen ja sen kantitaatin nimen jotako sie halvaat äänestää. Pane vaaliseeteli vaalikuerthiin. Liimaa kuertti kiini elikkä viikkaa sisäle nuskan. Sen sie saatat tehhä ilman ette oon toistajia matkassa.
2. Kahen toistajan läsnäollessa, pane sinun vaalikuertti kuerthiin jossako seisoo ”Ulkokuertti preiviäänestykselle”. Liimaa ulkokuertti kiini. Kirjota sinun henkilötiot ja sinun nimikirjotus selvästi ulkokuertin etupuolele. Kaikki tiot häätyy täyttää ette ääni hyväksythään.
3. Toistajat pitävät kirjottaa heän tiot ja nimikirjotukset selvästi ulkokuertin takapuolele. Kaikki tiot häätyy täyttää ette ääni hyväksythään.
4. Ota sitten esile kuertti joka oon merkattu ”Päälyskuertti preiviäänele”.
   Jos sulla oon äänestyskortti: Pane äänestyskortti ulkokuertin etheen päälyskuerthiin niin ette sinun kunnan vaalilautakunnan osote näkkyy päälyskuertin klasissa.
   Jos sulla ei ole äänestyskorttia: Pane ulkokuertti niin ette Vaaliviraston osote ulkokuertissa näkkyy päälyskuertin klasissa.
   
5. Tarkista ette sie olet menny läpi kaikki ylhäälä olevat askelheet. Jos sie olet menny läpi kaikki ylhäälä olevat askelheet niin sie olet valmis liimaahmaan kiini päälyskuertin ja panheen siiheen friimerkin! Lähätä sinun preiviäänen ulkomailta niin hoppua ko maholista mutta varhaimiten 25 huhtikuuta 2024. Preiviääni häätyy olla perilä aijalansa ääniräknäämisheen. Ääntä ei saa lähättää Ruottista.

Lähätä preiviääni varhaimiten 25 huhtikuuta

Jos sie preiviäänestät se tarkottaa ette sie etukätheisäänestät postin kautta ulkomailta hyvissä aijoissa ennen vaalipäivää.

Äänen pittää lähättää ette se oon perilä aijalansa ääniräknäämisheen. Ääntä ei räknätä jos se oon panttu posthiin Ruottissa.

Preiviääni lähätethään siiheen vaalipaikhaan Ruottissa johonka sie kuulut. Vaalipaikala äänestyskortti erotethaan vaalikuertista. Vaalikuertti panthaan sitten vaaliyyrhnaan toisitten äänitten kansa, samala laila ko jos sie olisit äänestänny vaalipaikala.

Toistajia

Sie tarttet kaks toistaijaa jokka oon täyttänheet 18 vuotta ette saattaa preiviäänestää. Toistajat ei tartte olla ruottalaiset kansalaiset.

Toistajat pitävät toistaa ette preiviääni oon tehty oikeala laila täyttämällä heän tiot ulkokuerthiin. Jos toistajilla ei ole ruottalaiset henkilönumerot net saattavat sen siihaan kirjottaa heän syntymätaatumin.

Se oon tärkeätä ette toistajat kirjottavat heän tiot selvästi niin ette ääntä ei hylätä.

Vaaliseeteli

Materiaalissa oon tyihä vaaliseeteli. Siiheen sie saatat kirjottaa sen parttion nimen ja sen kantitaatin nimen jotako sie halvaat äänestää jos sie halvaat henkilöäänestää. Muista ette kirjottaa selvästi.

Lissää informasuunia henkilöäänestämisestä, parttioista ja kantitaatista oon ruottiksi länkin kautta.

Äänestysoikeus ja äänestyskortti

Jos sulla oon äänestysoikeus sie olet matkassa ääniluettelussa ja saat äänestyskortin. Sinun äänestyskortissa seisoo sinun äänestysoikeus.

Sulla oon äänestysoikeus jos sie olet ruottalainen kansalainen ja olet elikkä olet ollu kansankirjoila Ruottissa. Sulla oon kansa äänestysoikeus jos sie olet jäsen jossaki EU:n jäsenmaissa, olet kansankirjoila Ruottissa ja olet ilmottannu ittesti ruottalaisheen äänestysluettelhuun.

Ruottalaiset kansalaiset jokka oon kansankirjoila Ruottissa otethaan automaattisesti matkhaan äänestysluettelhuun. EU-jäsenet jokka halvaavat matkhaan ruottalaisheen äänestysluettelhuun häätyvät ilmottaa ittensä lääninhallituksheen viimisthääns 30 päivää ennen vaalipäivää.

Huomioitte ette:

• Sie piät olla täyttäny 18 vuotta viimisthääns vaalipäivänä.
• Yhelä henkilöllä, joka ei koskhaan ole ollu kansankirjoila Ruottissa, ei ole äänestysoikeutta.
• Sie joka olet ulkomaanruottalainen ja asut jossaki muussa EU-maassa saatat sen siihaan valikoittea ette äänestää siinä maassa jossako sie asut. Ota siinä taphauksessa yhtheyttä vaaliviraston kansa siinä maassa jossako sie asut ette ilmottaa ittesti äänestysluettelhuun sielä. Äänestäjännä sie et saa ko äänestää yhessä maassa vaikka sulla oon tupla kansalaisuus.