Te stemma

- vällkrepa to Europaparlamentet do ennjato juni 2024

Konn motte dela si stemma?

Du kammar horrtepa te dela diro stemma om du hunkar svedikko temmengro, tchi terrner än desso-åjjto bersch purano dova dives vellkrepan aschar, ta hunkar eller har hunkat ranndrado dre Svedikko-temmen.

Svedikke temmengre manuscha kai aschar ranndrade dre Svedikko-temmen aschar ninna tele-ranndrade dre röstlängden. Hunkar du ranndrado dre vaver temm motte du an-dokka dé soles to röstlängden svakko dessto berscht. Je manusch kai tchi aschat ranndrado dre Svedikko-temmen kammar tchi horrtepa te dela siro stemma.

Du kammar ninna horrtepa te dela diro stemma om du hunkar temmengro dre jekk EU’engro temm, hunkar ranndrado dre Svedikko-temmen ta aschar an-dokkad to röstlängden. Dova keras glaner fonn trinn-dess divesa glan dives forr vällkrepan.

Du kai kammar horrtepa te dela diro stemma ler je karrtli forr välljkrepan mé posten. Pre dova stér info palla pre svao stedo du kan dela diro stemma. Kammar du tchi karrtli forr välljkrepa motte du le je nevo.

Tchakkes delar du diro stemma

Diro välljkrepa aschar tchorrjano. Du hunkar tchi tvingad te pukka forr vavren savo diro stemma ascha.

Lill forr te stemma aschar pre sass stedijar forr välljkrepa. Lillar forr te stemma to Euparlamentet aschar parrne. Forr te dela diro stemma, tchuvvrar du dre je savi lill andri je kuvert.

Kanna du delar diro stemma ska du sikkra je id-karrtli. Kammar du tchi je savo motte je vaver manusch sovvla forr du hunkar du. Avvar dollo motte kamma je id-karrtli.

Te stemma forr je politikko parti

Du delat diro stemma to je politikko parti, konneskro nav aschar ranndrade pre lillarna. Motte du tchi lattcha je lill fonn je politikko parti jar do lattcho te ranndra dolleskro nav pre je mukklo lill.

Te dela siro stemma forr je politikko parti ta je manusch

Volltrar du te dela diro stemma forr kommen särskild manusch dreann je politikko parti ska du ranndra je kryss glan dolleskro nav pre lillen. Je motte blott kera kryss forr jekk nav. Do jar ninna lattcho te ranndra je nav pre je mukklo lill forr te stemma forr je manusch.

Dela diro stemma glaner fonn dives forr välljkrepan dre diro eller vaver kommun

Je motte dela si stemma kai je volltrar te pre stedijar forr välljkrepa dre saro temmen. Dova motte keras glan dives välljkrepan aschar. Je motte dela si stemma fonn do biss-å-dyto maj ta to-an do ennjato juni. Du motte kamma ninna diro karrtli forr te dela diro stemma. Aschar dova naschlo motte du le je nevo.

Dela diro stemma dre diro stedo forr välljkrepa do ennjato juni

Svakko manusch aschar panndlo to jekk särskilt stedo forr välljkrepa. Dova stedo aschar blott kerdo pre forr dova dives vällkrepan keras vri. Du motte blott dela diro stemma dre dova stedo kai aschar ranndrado pre diro karrtli forr välljkrepa.

Dela siro stemma fonn vaver temm

Boddrar du eller hunkar dre vaver temm motte du bistchra diro stemma dre lill eller dela diro stemma pre je Svedikko ambassad eller konsulat. Forr te dela diro stemma dre je bischtrado lill motte du kamma särskilda lillar. Du ska ninna kamma dy vittnen kai sovvlar forr att du hunkar du. Diro stemma motte bischtras fonn biss-å-panschto april. Pre ambassader ta konsulat jar do lattchot te dela si stemma fonn dess-å-schååto maj.

Dela si stemma preall vaver manusch

Hunkar du dukkalo, langalo eller purano ta tchi motte ja to stedo forr välljkrepan jar do lattcho te bischtra je vaver manusch glan dives forr välljkrepan. Forr te kera tchakkes motte du kamma särskilda lillar. Je savo stemmepa motte keras fonn do dess-å-schååto maj to do ennjato juni.

Du motte kamma kommen kai ler ninna diro lill ta jekk vaver kai vittne, kai sovvlar forr dé. Svakko jekk motte kamma dess-å-åkkto berscht purepa, ta do motte ascha dy vaver manusch. Om dollo bischtrado ska dela diro lill forr stemma dre je tchommen stedo glan dives forr vällkrepan, motte dollo kamma ninna diro karrtli forr te stemma.

Du motte ninna bischtra diro stemma mé vaver manusch om du hunkar stråtad eller pre stillepa. Ninna om du boddrar kaj je lantbrevbärare aschar motte du bischtra diro stemma mé lesster.

Konn motte bischtras mé stemma?

Dollo bischtrado motte aschar dess-å-åkkto berscht purano. Dollo motte ascha:

• diro narrta
• diro rakkepaskro eller kommen Kai hasstrar dé te kera kovver du tchi motte kera soles.
• je klisepaskro pre starrepan eller stillepan.
• je lillengro, om du boddrar kai je lantbrevbärarlinje aschar.
  

Trujall-tradrane manusch te dela si stemma to

Du kai hunkar dukkalo, purano eller langalo ta tchi motte ava to stedo forr stemmepa soles, du motte dela diro stemma to trujall-tradrane manusch fonn je kommun. Le kontakt to diro kommun forr lennde te kera pre forr dy manuscha te ava kere dutte te le diro stemma.

Puttchepan?

Volltrar du te le material, je nevo karrtli forr te stemma eller kammar puttchepan palla kaj ta kanna du motte dela diro stemma? Le kontakt to valnämnden dre diro kommun. Pre internet jar du dre pre www.val.se eller tavar to Valupplysningen pre tav 020-825 825 (fonn Svedikko-temmen) eller pre tav +46 771 270 999 (fonn vaver temm).