Jienastit

– válljim Europa parlamänntaj ájllega biehtsemáno 9.b. 2024

Gänna l loahpe jienastit?

Dujna l jienastimriektá jus dån la svieriga viesajdidde, ållim la 18 jage maŋemusát válljimbiejve ja l jali l årrum álmmuktjáledum Svierigin.

Svieriga viesajdiddje gudi li álmmuktjáledum Svierigin automáhtalattjat tjáleduvvi jienastimlågon. Jus dån la álmmuktjáledum ålggorijkan de dån hähttu ietjat diededit jienastmlåhkuj juohkka lågåt jage. Ulmutjin gut ij la goassak årrum álmmuktjáledum Svierigin ij la jienastimriektá.

Dujna l aj jienastimriektá jus dån la viesajdiddje EU:a sebrulasjrijkan muhtemin, la álmmuktjáledum Svierigin ja l ietjat diededam jienastimlåhkuj. Dån ietjat diededa lenstivrraj maŋemusát 30 biejve åvddål válljimbiejve.

Dujna gänna l jienastimriektá oattjo jienastimkårtåv påvståjn. Jienastimkårttå sisanet diededimev duv jienastimriektá birra ja gånnå dån besa jienastit. Jus dujna illa ietjat jienastimkårttå de dån máhtá rávvit ådåsav.

Návti dån jienasta

Gåktu dån vállji l tjiegos ja dån i dárbaha giehttot aktasik masi dån jienasta.

Válljimsiedila gávnnuji gájkka sajijn gånnå dån besa jienastit. Válljimin Europaparlamänntaj de gájkka válljimsiedila li vielggada. Gå dån jienasta de dån bieja avtav válljimsiedilav avtan válljimkuveran.

Gå dån jienasta de dån galga vuosedit ID-ássjetjállagav. Jus dujna illa ID-ássjetjála de ietjá ulmusj máhttá duodastit duv identitehtav, valla dalloj dat ulmusj hähttu vuosedit ietjas ID-ássjetjállagav.

Jienastit belludahkaj

Dån jienasta avta belludahkaj. Belludagá namma l tjáledum válljimsiedilin. Jus dån i gávna duv belludagá válljimsiedilav de dån máhtá tjállet belludaga namáv guoros blankähttaj.

Jienastit belludahkaj ja ulmutjij

Jus dån sidá sierra ulmusj belludagá kandidáhtajs galggá válljiduvvat, de dån máhtá ruossit gahpan kandidáhta namá åvddålin válljimsiedilin. Dån val máhtá ruossit avta kandidáhttaj. Tjále belludagá ja kandidáhtta namáv guoros válljimsiedilij de dån máhtá aj sierra ulmutjij jienastit.

Åvddålájgejienastit ietjat jali ietjá kommuvnan

Gávnnuji lanjá åvddålájgejienastibmáj. Dån besa jienastit akta makkir lanján åvddålájgejienastibmáj ålles rijkan. Åvddålájgejienastibme álggá moarmesmáno 22.b. ja joarkká gitta biehtsemáno 9.b. Dån hähttu vuosedit ietjat jienastimkårtåv gå dån åvddålájgejienasta, jus dån la dav lahppám de dån máhtá oadtjot ådåsav.

Jienastit duv válljimlanján válljimbiejve biehtsemáno 9.b.

Gájkka jienastiddje gulluji avta válljimladnjaj. Válljimladnja l val rahppot válljimbiejve. Då máhtá val jienastit dan válljimlanján mij la tjáledum ietjat jienastimkårtån.

Jienastit ålggorijkas

Jus dån åro jali l ålggorijkan de besa brevvajienastit jali åvddålájgejienastit moatten svieriga ambassádan ja konsuláhtan. Brevvajienastittjat de dån hähttu rávvit sierralágásj ábnnasav. Dujna dárbaj aj guokta vihtana gudi li ållim 18 jage. Loahpe l aj jienav påvsståj guodet áramusát vuoratjismáno 25.b. Då máhtá aj åvddålájgejienastit ambassádajn jali konsuláhtajn áramusát moarmesmáno 16.b.

Jienastit budájn

Dån máhtá jienastit budájn jus dån skibádagá, sáhtusvuoda jali vuorasvuoda diehti iesj i máhte mannat ietjat válljimladnjaj jali ladnjaj åvddålájgejienastibmáj. Dalloj dån hähttu rávvit sierralágásj ábnnasav. Loahpe l jienav gárvvit áramusát moarmesmáno 16.b. ja maŋemusát biehtsemáno 9.b.

Dån dárbaha budáv ja vihtanav. Goappátja galggaba ållim 18 jage ja ij oattjo årrot sämmi ulmusj gut la goappátjagá budá ja vihtan. Jus budá galggá guodet duv jienav lanján åvddålájgejienastibmáj de sån hähttu maŋŋáj válldet duv jienastimkårtåv.

Dån máhtá aj jienastit budájn jus dån la fáŋŋgidum jali kriminállasujttoásadussaj biejadum. Duodden dån gut åro dáfopåvsståguoddemanádagá milta budájienastit dáfopåvsståguoddijn viehkken.

Gut dåhkki budán?

Budá hähttu ållim binnemusát 18 jage. Budá máhttá årrot:

• duv lágámus
• duv sujtár jali soames gut álu duv viehket aktugasj ássjij
• bargge fáŋgán jali kriminallasujttoásadusán
• dáfopåvsståguodde, jus dån åro dáfopåvsståguoddemanádagá milta.

Jåhtte jiednaduostudahka

Jåhtte jiednaduostudahka (ambulerande röstmottagning) l dunji gut skibádagá, vuorasvuoda jali sáhtusvuoda diehti iesj ij besa åvddålájgejienastit jali jienastit válljimlanján. Jåhtte jienastimen duv kommuvnna ásat guokta jiednaduostudiddje gudi boahteba duv lusi ja duostoba duv jienav. Aktavuodav válde duv kommuvnajn ienep diedojda.

Gatjálvisá?

Jus dån sidá rávvit ábnnasijt, ådå jienastimkårtåv jali dujna li gatjálvisá birra gånnå ja gåktu dån máhtá jienastit! Aktavuodav válde kommuvna válljimsiebrrerádijn, gehtja www.val.se jali riŋŋgi Válljimdiededibmáj telefåvnnå 020-825 825 (Svierigis) jali +46 (0) 771 270 999 (ålggorijkas).