Publicerad: 23 december 2020

Lahtasa ja sajjásadtja

Dánne gävdnu diededibme gukkte lahtasa ja sajjásadtja mierreduvvuji Sámediggen.

Fiert mandáhttaj Sámediggen mav juhkusa, partija ja sjimuk akktavuoda lä udtjum mierreda lienastivvra aktav lahtasav. Maŋŋel mierreda lienastivvra aj sajjásadtjajt lahtasijda.

Lahtasa

Vuostak almatjjiena ma mierredi

Lä vuostak almatjjiena ma mierredi maggár kandidáhta välljiduvvuji.

Ruodtjolvis, dat hållá tsaggam, sisavälljiduvvut almatjjienaj bakkto lä ahte kandidáhtan lä udtjum binnámus 5 prosienta partija gájk jiednalågost, men binnámus 25 almatjjiena.

Jus kandidáhttanamma gävdnu ienap umasse listojn sämmi partijaj rekknuduvvuji almatjjiena tjåhkkáj dajst listojst.

Dajst ma lä biessam tsaggamav lä dat kandidáhtta mij lä udtjum ienamus almatjienajt mij udtju partija vuostas mandáhtav. Dat gie lä udtjum mubbe ienamus almatjjienajt udtju mubbe mandáhtav ja nåvt.

Jus ienap kandidáhta lä udtjum sämmi iedna jienajt dä lienastivvra giessá vuorbev daj gaskan.

Jus partija lä udtjum ienap mandáhtajt gu kandidáhta ma lä biessam almatjjiena tsaggamav dä aneduvvu nåvt gåhtjoduvvum ålleslåhkovuohke (giehtja vuällen) gu ietjá lahtasa mierreduvvuji.

Mubbádin sisavälljiduvvum ålleslåhkovuoge tjara

Ålleslåhkovuohke lä vuohke mierredit lahtasijt ma ie lä almatjjienaj välljiduvvum.

Ålleslåhkovuohke buakktá välljimsedila urdniduvvuji dan kandidáhttanama mehti mij lä bajemusan ienamus välljimsedelijn. Ij lágeduvvu kandidáhtajst ma lä mierreduvvum lahtasijda almatjjienaj tjara.

Jus partija adná bär aktav listov dä mandáhta praktijkan vaddeduvvuji kandidáhtajda dan urdniga mihte mij lä liston.

Jus partija adná ienap listojt dä rekknum sjaddá vil vijdáp. Rekknumvuorro dagaduvvu fiert mandáhttaj mij gallgá mierreduvvut. Fiert vuoro maŋŋel dat gie lä juo sisavälljiduvvum ij rekknuduvvu ja välljimsedila tjuoldeduvvuji årråsit namaj mehti ma lä bajemusan.

Årrå buohtalågojlåhko rekknuduvvu maŋep nammaj liston gunne namma mij väldij mandáhtav tjuodtjoj. Ietjá kandidáhta, ma lä bajemusan, idni ietjase buohtalågojlågov kuora. Dan nammaj mij dál adná bajemus buohtalågojlågov vaddeduvvu maŋep mandáhtta.

Ja nåvt jåttká rekknum dasa gu gájk mandáhta lä biejaduvvum. Jus buohtalågojlåhko lä sämmi guäkkte jala ienap kandidáhtaj gaskan dä vuärrbe gieseduvvu sajjáj daj gaskan.

Sajjásadtja

Sajjásatj lä almatj mij lä vuoron sisavälljiduvvut lahtasin jus ladas galgaj häjjtet mandáhttaájgen.

Fiert lahtasij gallgá sämmi iedna sajjásadtja mierreduvvut gu partija lä mandáhtajt udtjum. Men verrtiji agev mierreduvvut binnámus gålbmå sajjásadtja vajgu partija lä udtjum binnáp mandáhtajt gu gålbmå. Akkta sajjásatj máhttá sajjásatj årrot ienap lahtasijda.

Vuostak mierreduvvuji kandidáhta ma lä biessam tsaggamav almatjienaj hárráj sajjásadtjan. Rekknuma minni sämmiláhkáj gu gåsse lahtasa mierreduvvuji almatjjienaj hárráj, giehtja bajjen.

Mubbádin mierreduvvu dat kandidáhtta mij lä jur maŋŋelin välljiduvvum lahtasin liston. Sajjásadtja älu mierreduvvuji dán láhkáj, danen gu kandidáhta ma lä tsaggamav biessam almatjjienaj hárráj juo lä älu sjaddam lahtasin.

Rekknumåvvdåmärrka – gukkte lahtasa ja sajjásadtja mierreduvvuji

Partija X inij välljimin guäktte listo kandidáhtaj, nr 00100 ja nr 00200.

Partija X ådtjoj tjåhken 410 jiena. Dat viddij gålbmå mandáhta. Jiena juogeduvvuji guokte lisstuj návt:

Välljimsedil lissto 00100 – 151 jiena

  1. Anders Andersson
  2. Björn Baer
  3. Carl Calais
  4. David Denson
  5. Eva Erlandsson
  6. Fia Fjällman
  7. Gerd Gunnarsson
  8. Helena Harnek
  9. Inga Ingelson
  10. John Jansson

Välljimsedil lissto 00200 – 259 jiena

  1. Karin Kanna
  2. Linn Loman
  3. Mariann Monet
  4. Nina Nutti
  5. Olof Omma
  6. Per Peter Pilvi
  7. Quer Qvarts
  8. Rakel Ranelid
  9. Susanne Sikku
  10. Tinna Tranström

Lávkest lávvkáj – gie sjiddi lahtasin?

  1. Rekknu tsaggamav almatjienaj hárráj. Tsaggam almatjjienaj hárráj lä 5 prosienta jienajst partijast. Danen gu 5 prosienta 410 jienajst lä 21 jiena merrki ahte akkta kandidáhtta Partija X åvdåst verrtij ådtjot binnámus 21 almatjjiena välljiduvvut almatjjienaj tjara.
  2. Duädden lä ruodtjolvis binnámus 25 almatjjienajst. Partija X åvdåst merrkiji binnámus 25 jiena dán bálen.
  3. Giehtjada gie lä biessam tsaggamav almatjjienaj hárráj. Guäkkte kandidáhta, Karin Kanna ja Björn Baer, dävvdaba ruodtjolvasajt välljiduvvut almatjjiena tjara ja mierreduvvuba danen lahtasin.
  4. Danen gu ällä ietjá kandidáhta dävvdám ruodtjolvasajt almatjvälljimij gallgá gålmát mandáhtta mierreduvvut ålleslåhkovuoge mehti.
  5. Gádoda kandidáhtajt ma lä válldám mandáhtajt ja giehtja maggár kandidáhta lä dál bajemusan listojn. Bajemusan fiert liston gu vuostas mandáhta lä mierreduvvum lä Anders Andersson (lissto 00100) ja Linn Loman (lissto 00200).
  6. Rekknu buohtalågojlågov dajda kandidáhtajda ma lä bajemusan. Daj buohtalågojlågo lä sämmi gu jienalågo fiert lisstuj, dat hållá 151 Anders Anderssona åvdåst ja 259 Linn Lomana åvdåst.
  7. Dat mij adná alemus buohtalågojlågov, Linn Loman, udtju gålmát mandáhtav.

Lávkest lávvkáj – gie sjiddi sajjásadtjan?

  1. Verrtiji agev mierreduvvut binnámus gålbmå sajjásadtja fiert lahtasij. Akkta almatj máhttá sajjásatj årrot ienap lahtasijda.
  2. Giehtjada jus nágan kandidáhtta máhttá mierreduvvut sajjásadtjan almatjjienaj hárráj. Vásstádis lä ij, kandidáhta ma lä biessam tsaggamav lä juo mierreduvvum lahtasin.
  3. Danan gu lahtasa ma lä mierreduvvum buhti gåbbátjak listojst dä Partija X udtju guäkkte juhkusa sajjásadtjaj, dat hållá guäkkte nåvt gåhtjoduvvum sajjásatjjuhkusa.
  4. Karin Kannaj ja Linn Lomanij sjiddi sajjásadtjan da gålbmå ma tjuvvu lagamus daj maŋŋel liston nr 00200. Dá lä Marianne Monet, Nina Nutti ja Olof Omma ma sjiddi sajjásadtjan gåbbátjak Kanna ja Lomana åvdåst.
  5. Björn Baerij sjiddi sajjásadtjan da gålbmå ma lä bajemusan liston nr 00100 ietján gu sån ietj, dat hållá Anders Andersson, Carl Calais ja David Denson. Da sjiddi sajjásadtjan bär Baera åvdåst.

Mandáhttajuohkem lága mehti

Gu lienastivvra mierreda lahtasijt aneduvvuji njuolgadusajt 14. kap 9 ja 10 §§ välljimlágan (2005:837) välljima birra rijjkabäjjváj.

Kandidáhtta dárbaha duädden binnámus 25 almatjjiena jus gallgá almatjjienaj tjara välljiduvvut.

Njuolgadusa mierredit lahtasijt ja sajjásadtjajt välljimlága mehti (dáron)länk till annan webbplats

Val och folkomröstningar