Publicerad: 23 november 2020

Jiednariekknim ja válljimboados

Dánna oattjo ienep diedojt gåktu jiednariekknim dagáduvvá ja gåktu válljimboados dagáduvvá válljimin Sámediggáj.

Norrbottena lenastivrra riekknigoahtá jienajt mánnodagá vahko válljima maŋŋela.

Válljimin Sámediggáj 2021 jiednarikknim álggá moarmesmáno 24.b. 2021.

Jiena gehtjaduvvi ja válljimkuvera biejaduvvi jienastimlihttáj

Lenastivrra gähttjá jienajt. Jus jiena li gárvvidum riektaláhkáj de jiena biejaduvvi válljimlihttáj ja válljijiddje mihttiduvvá jienastimlågon.

Jienaj gähttjam válljimlanjájs

Jiednariekknijiddje gähttji vuostak jienajt válljimlanjájs. Rahpi dåhkkidum ålgoldiskuverajt ja válldi ålgus válljimkuverajt.

Jus válljimkuvera l riekta gárvvidum de jiednariekknijiddje biedji dajt válljimlihttáj ja mihttiji válljijiddjev jienastimlågon.

Ålgoldiskuveran, mij aj la jienastimkårttå, válljijiddje namma l tjáledum. Gå jiednariekknijiddje biedjá valljimkuverav válljimlihttáj de namma sieraduvvá jienas ja nåvti válljijiddje válljimtjiegosvuohta suoddjiduvvá.

Brevvajienaj gähttjam

Gå jiednariekknijiddje li gähttjam gájkka valljimladnjajienajt de gähttji brevvajienajt ja gehtjadi jiena li gárvvidum riektaláhkáj.

Jiednariekknijiddje gehtjadi válljijiddje ij la mihttidum jienastimlågon.

Jus válljijiddje l juo mihttidum jienastimlågon de merkaj válljijiddje l jienastam válljimlanján. Brevvajiedna de ij dåhkkiduvá ja ij biejaduvá jiednalihttáj.

Válljimlihtte duobbmiduvvá ja válljimsiedila riekkniduvvi

Maŋel gå lenastivrra l gähttjam jienajt ja l biedjam dåhkkidum válljimkuverajt válljimkihttáj de válljimlihtte duobbmiduvvá.

Vuostak riekkniji válljimsiedilij lågov juohkka juohkusij, belludahkaj jali dakkir lihttuj. Maŋŋela riekkniduvvá almasjjienaj låhko juohkka kandidáhttaj.

Lenastivrra árvustallá válljimsiedilijt

Lenastivrra árvustallá válljimsiedilijt návti:

  • Jus válljijiddje l ruossim guovte jali moatte kandidáhttaj – de sjaddá jiedna belludahkaj, valla ij almasjjiedna.
  • Jus válljijiddje l biedjam guokta jali moadda válljimsiedila belludahkaj válljimkuveran, valla umasse kandidáhttalista jali ruossim umasse kandidahtajda válljimsiedilijn – de sjaddá jiedna belludahkaj, valla ij almasjjiedna.
  • Jus válljijiddje sáhtsu jali duoddi namáv kandidáhttaj – de dav lenastivrra ij vieleda.

Válljimsiedila ma árvustaláduvvi fámodibmen

Válljimsiedila árvustaláduvvi fámodibmen jus:

  • Ij la tjáledum belludahka válljimsiedilin
  • Válljimsiedilin la dåbddomerka ma vuojnnet li dagádum ájggomusájn, buojkulvisssan la tjáledum gut la jienastam,
  • Válljimsiedilin la ienep gå akta belludaknamádus jali jus li válljimsiedila ienep belludagájda válljimkuveran.
Val och folkomröstningar