Ette äänestää

– vaali Europpaparlamenthiin pyhänä 9 kesäkuuta 2024

Kukas saapii äänestää?

Sulla oon äänestysoikeus jos sie olet ruottalainen kansalainen, olet täyttäny 18 vuotta, viimisthään vaalipäivänä ja olet elikkä olet ollu kansankirjoila Ruottissa.

Ruottalaiset kansalaiset jokka oon kansankirjoila Ruottissa otethaan auttomaattisesti matkhaan äänestysluettelhuun. Jos sie olet kansankirjoila ulkomaila sie tarttet ilmottaa ittesti äänestysluettelhuun joka kymmenes vuosi. Henkilöllä, joka ei koskhaan ole ollu kansankirjoila Ruottissa, ei ole äänestysoikeutta.

Sulla oon kansa äänestysoikeus jos sie olet kansalainen jossaki EU;n jäsenmaassa, olet kansankirjoila Ruottissa ja olet ilmottannu ittesti äänestysluettelhuun. Sie ilmotat ittesti lääninhallituksheen viimisthääns 30 päivää ennen vaalipäivää.

Jos sulla oon äänestysoikeus sie saat äänestyskortin postin kansa.

Äänestyskortissa oon informasuunia sinun äänestysoikeuesta ja missä sie saatat äänestää. Jos sulla ei ole äänestyskorttia sie saatat tilata uuen.

Näin sie äänestät

Sinun äänestys oon salhainen etkä sie tartte kelheen sanoa mitä sie äänestät.

Vaaliseeteliä oon kaikissa paikoissa jossako sie saatat äänestää. Kaikki vaaliseetelit oon valkeat ko äänestethään Eurooppaparlamenttivaalissa. Ko sie äänestät sie panet yhen vaaliseetelin vaalikuerthiin.

Ko sie ääänestät sie piät näyttää itenttiteettipaperin. Joku muu henkilö saattaa toistaa sinun itenttiteetin jos sulla ei ole itenttiteettipaperia, mutta silloin se henkilö pittää näyttää hänen itenttiteettipaperin.

Äänestää parttiota

Sie äänestät yhtä parttiota. Parttion nimi oon vaaliseetelissä. Jos sie et löyvä sinun parttion vaaliseeteliä sie saatat kirjottaa parttion nimen tyihhään vaaliseetelhiin

Äänestää parttiota ja henkilöä

Jos sie halvaat ette joku erityinen parttion kantitaatista tullee valituksi, sie saatat panna kryssän ruuthuun kantitaatin nimen etheen vaaliseetelissä. Sie saatat vain kryssätä yhtä kantitaattia. Sie saatat kansa henkilöäänestää kirjottamalla parttion nimen ja kantitaatin nimen tyihän vaaliseetelin pääle.

Etukätheisäänestää sinun omassa elikkä muussa kunnassa

Niitä oon paikkoja etukätheisäänestykselle. Sie saatat äänestää missä etukätheisäänestyspaikassa tahansa koko maassa. Etukätheisäänestys alkaa 22 toukokuuta ja oon käynissä 9 kesäkuuhuun saakka. Sulla häätyy olla sinun äänestyskortti matkassa ko sie etukätheisäänestät, jos sie olet puottanu sen sie saatat saaja uuen.

Äänestää sinun vaalipaikassa vaalipäivänä 9 kesäkuuta

Kaikki äänestäjät kuuluvat johonki äänestyspaikhaan. Vaalipaikka ei ole auki ko vaalipäivänä. Sie saatat vain äänestää siinä paikassa joka seisoo sinun äänestyskortissa.

Äänestää ulkomailta

Jos sie asut elikkä olet ulkomaila sie saatat preiviäänestää elikkä etukätheisäänestää monela ruottalaisela ampasaatila ja konsylaatila. Jos sie preiviäänestät sie piät tilata vasitun materiaalin. Sie tarttet kansa kaks vierasmiestä jokka oon täyttänheet 18 vuotta. Äänestyksen saapii lähättää postin kautta ulkomailta varhaisiinthaans 25 huhtikuuta. Sie saatat etukätheisäänestää ampasaatila elikkä konsylaatila varhaisiinthaans 16 toukokuuta.

Äänesää asiamiehen kautta

Sie saatat äänestää asiamiehen kautta jos sie saihrauen, toimintarajotuksen elikkä iän vuoksi et itte pääse sinun vaalipaikhaan elikkä paikhaan etukätheisäänestykselle. Silloin sie tarttet tilata vasitun materiaalin. Äänestyksen saattaa laittaa valhmiiksi varhaisiinthaans 16 toukokuuta ja viimisthääns 9 kesäkuuta.

Sie tarttet asiamiehen ja vierasmiehen. Molemat pitävät olla täyttänheet 18 vuotta ja sama henkilö ei saa olla niin asiamies ko vierasmies. Jos asiamies meinaa jättää sinun äänestyksen etukätheisäänestyspaikhaan hään pittää ottaa matkhaan sinun äänestyskortin.

Sie saatat kansa äänestää asiamiehen kautta jos sie olet piätetty elikkä olet kriminaalihoitoanstaltissa. Sitä paitti sie, joka olet maalaispostinkuljettajalinjala, saatat asiamiesäänestää maalaispostinkuljettajan avula.

Kukas saattaa olla asiamies?

Asiamies häätyy olla vähhiinthääns 18 vuotta. Asiamies saapii olla:

• sinun omhainen
• sinun hoitaja elikkä joku joka pruukaa auttaa sinuna henkilökohtasitten asioitten kansa
• työntekiä fankilassa elikkä kriminaalihoitoanstaltissa
• maalaispostinkuljettaja jos sie olet pitkin maalaispostinkuljettajalinjaa.
  

Kiertävä äänestysvasthaanotto

Kiertävä äänestysvasthaanotto oon sulle joka saihrauen, iän elikkä toimintarajotuksen vuoksi et itte saata etukätheisäänesää elikkä äänestää vaalipaikassa. Kiertävällä äänestysvasthaanotola kunta järjestää ette kaks äänestysvasthaanottaijaa tullee sinun työ kotia ottamhaan vasthaan sinun äänestyksen. Ota yhtheyttä sinun kunnan kansa ette saaja lissää informasuunia.

Kysymyksiä?

Halvaaks tilata materiaalia, uuen äänestyskortin elikkä jos sulla oon kysymyksiä missä ja kunka sie saatat äänestää? Ota yhtheyttä kunnan vaalilautakunnan kansa, käy webbisuvula: www.val.se elikkä soita Valupplysningen/Vaalitietotus telefooni 020-825 825 (Ruottista) elikkä +46 (0) 771 270 999 (ulkomailta).