Te glasine ko izborija
Kurko, ko 11to Septembar 2022 ka ovel izborija baš o parlamenti, komuna hem regioni.
Ko šaj te glasini?
Te ovel tut pravo te glasine valjani te ovel tut 18 berš. I informacia so isi ko nacionalno registar 30 dive angljeder o izborija mothovi da li tu isi tut pravo te glasine hem ki savi izborno distrikcia pripadineja.
Tu isi tut pravo te glasine baš o parlamenti ako hijan:
- Švedsko državljani hem hijan ko nacionalno registar ki Švedska.
Tu isi tut pravo te glasine baš i komuna hem regioni ako hijan:
- Švedsko državljani hem hijan ko nacionalno registar ki Švedska
- državljani ki Evropakiri unia ja ki Island ja ki Norveška hem hijan ko nacionalno registar ki Švedska
- državljani ki jekh aver phuv, ama o palune trin berš hijan ko nacionalno registar ki Švedska.
Tu so isi tut pravo te glasine ka dobine jekh pozivnica
Tu so isi tut pravo te glasine ka dobine jekh pozivnica prekalji pošta trin kurče angljeder o izborija. Ki odija pozivnica pisini ko so šaj te glasine, hem othe isto pisini to anav, adresa hem đi keda tano phravdo o lokali kaj so šaj te glasine. Ako našalđan i pozivnica, tu šaj te poručine jekh nevi ki komuna ja ko Valmyndigheten.
Ljila baš o izborija
O žuta ljila tane baš o parlamenti, o parne ljila tane baš i komuna hem o plava ljila tane baš o regioni. Sa akala ljila isi ko than kaj so ka glasine.
Glasin baš i partija
Tu glasineja jekhe partijače. E partiakoro anav pisini ko ljil. Ako na arakheja i partija kase mangeja te glasine, tu šaj te pisine e partiakoro anav ko prazno ljil.
Glasin e manušese
Ako mangeja e partiakoro kandidati te ovel birimo, ko ljil valjani te čhive jekh x ko kvadrati anglo e kandidatesoro anav. Tu šaj te birine samo jekhe kandidate. Akava šaj hem ko prazno ljil te čere, te glasine e manušese hem e partiače.
Akate šaj te glasine
11to Septembar šaj te glasine ko to izborno lokali
Tu šaj te glasine ko odova izborno lokali so pisini ki pozivnica. O lokali tano phravdo samo ko dive keda tano o izbor. Ked glasijan gotovo i izborno komisia registririni to glaso hem čhivela ko kutije.
Šaj te glasine hem agljeder o izborno dive
Tu šaj te glasine hem agljeder ako mangeja ko bilo kova izborno lokali ki celo phuv. Odova šaj te čere kotar o 24to Avgust sa đi ko izborno dive. Tu valjani te ovel tut ti pozivnica tuvaja ked ka glasine. Pobuter informacia šaj te arakhe ki ti komuna ja ko val.se.
Glasin kotar aver phuv
Ako hijan ki jekh aver phuv tu šaj te glasine ko Švedska ambasade ja ko konzulatija pekalo jekh ljil. Odova ljil isi olje specialno materiali hem šaj te lje kotar Valmyndigheten, ki komuna, ko ambasade ko konzulatija. O glaso kotar aver phuv šaj te bičhalji pe kotar 28to Juli. A ko ambasade hem ko konzulatija šaj te glasine kotar 18to Avgust.
Tu valjani te mothove so tu hijan tu
Keda ka glasine valjani te mothove ti id-karta. Ako nane tut id-karta, jekh aver manuš šaj te potvrdini to identiteti, ama odova manuš valjani te mothovi pi id-karta.
Ako valjani tuče pomoč te glasine
Glasin prekalo kurir
Tu šaj te glasine prekalo jekh aver manuš, ako hijan nabormo, sebepi invaliditeti ja sebepi o berša našti te ave đi ko jekh lokali. Tu šaj te glasine prekalo jekh aver manuš ako hijan ko phandlipe. Odova šaj te čere kotar 18to Avgust đi ko izborno dive. Tuče valjani kuriri hem svedoko. Solduj đene valjani te ovel oljen najhari 18 berš.
Tuče valjani kurir – ko šaj te ovel odova?
O kuriri valjani te ovel olje najhari 18 berš. Akala manuša šaj te oven kuriri:
- to relativno paše manuš
- manuš so pomožini tut ko personalno pučiba
- manuš so čerela buti ko phandlipe
- jekh gavutno poštari, ako bešeja ki gavutni poštakiri linia.
Te glasine prekalo jekh aver manuš valjani tuče jekh specialno materiali so šaj te lje kotar Valmyndigheten ja ki komuna. Odova manuš valjani te ovel olje hem ti pozivnica.
Ambulantno izborno lokali
Ambulantno izborno lokali tano tuče so sebepi o nabormipe, sebepi invaliditeti ja sebepi o berša našti te ave đi ko jekh lokali. Tegani ti komuna bičhalji duj manušen te aven koro tute čhere sebepi tuče te ovel pokolaj te glasine. Kontaktirin ti komuna ako mangeja pobuter informacia.