Jïenestidh
Aejlegen skïereden 11. biejjien 2022 dellie veeljeme rïjhkebeajjan, tjïelte- jïh dajvefaamoehkasse.
Gie åådtje jïenestidh?
Jis luhpiem åadtjodh jïenestidh tjoereme 18 jaepieh minngemes veeljemebeajjan illedh. Bïevnesh almetjelåhkoeregisterisnie 30 biejjieh veeljemebiejjien åvtelen nænnoste mejtie dov lea veeljemereakta jïh mennie veeljemedajvesne edtjh jïenestidh.
Dov lea veeljemereakta rïjhkebeajjan jis datne:
- svïenske staatenårroje jïh jallh Sveerjen almetjelåhkosne orreme.
Dov lea veeljemereakta tjïelte- jïh dajvefaamoehkasse jis datne:
- svïenske staatenårroje jïh Sveerjen almetjelåhkosne.
- staatenårroje naan Europeiske unijovnen lïhtsegelaantine jallh staatenårroje Islaantesne jallh Nöörjesne jïh Sveerjen almetjelåhkosne.
- årroje naan jeatjebe laantesne jïh almetjelåhkosne Sveerjesne golme jaepieh veeljemebiejjien åvtelen orreme.
Datne gïen veeljemereakta jïenestimmiekåarhtem åadtjoeh.
Datne gïen veeljemereakta veeljemekåarhtem påastine åadtjoeh mahte golme våhkoeh veeljemen åvtelen. Veeljemekåarhtesne vuajnah mij veeljemidie maahtah jïenestidh, dov nommem, adresse jïh gåessie dov veeljemesijjie ræhpas. Jis ij leah dov naan veeljemekåarhte maahtah orre kåarhtem tjïelteste jallh Veeljemebyjjesfaamoste dongkedh.
Veeljemesïetelh
Veeljemesïetelh rïjhkebeajjan leah viskes, tjïeltefaamoehkasse leah veelkes jïh dajvefaamoehkasse plaaves. Veeljemesïetelh gaajhkine sijjine gååvnesieh gusnie maahtah jïenestidh.
Partijese/krærran jïenestidh
Evtemes akten krærran jïenesth.
Krirrien nomme veeljemesïetelisnie vuajnah. Jis ih dov krirrien veeljemesïetelem gaavnh maahtah krirrien nommem akten gåaroes veeljemesïetelasse tjaeledh.
Almetjasse jïenestidh
Jis naan sjïere kandidaatem krirreste sïjhth veeljedh, dellie kroessem bïejh rovhtese dan kandidaaten nommen åvtelen dennie nommeveeljemesïetelisnie. Maahtah kroessem bïejedh barre akten kandidaatese. Aaj maahtah almetjasse jïenestidh jïh krirrien nommem jïh kandidaaten nommem akten gåaroes veeljemesïetelasse tjaeledh.
Daesnie maahtah jïenestidh
Dov veeljemesijjesne veeljemebiejjien skïereden 11. biejjien jïenestidh
Maahtah barre jïenestidh dennie veeljemesijjesne mij dov veeljemekåarhtese tjaaleme. Veeljemesijjie barre veeljemebiejjesne ræhpas. Gosse veeljemesijjesne jïenesth dellie datnem jïenestimmielåhkosne mïerhkesje jïh dov jïenestimmieh veeljemegaaran bïejesåvva.
Åvtelhbodti jïenestidh jïenestimmiesijjesne dov tjïeltesne jallh naan jeatjebe tjïeltesne.
Maahtah åvtelhbodti jïenestidh saaht mennie jïenestimmiesijjesne abpe laantesne. Åvtelhbodti jïenestimmie mïetsken 24. biejjien aalka jïh veeljemebeajjan vaasa. Tjoerh dov veeljemekåarhtem meatan utnedh gosse åvtelhbodti jïenestidh. Bïevnesh gusnie åvtelhbodti jïenestidh dov tjïeltesne gaavnh jallh sijjesne val.se
Ålkoerïjhkeste jïenestidh
Jis datne ålkoerïjhkesne maahtah prievine jïenestidh jallh åvtelhbodti jïenestidh gellie svïenske ambassaadine jïh konsulaatine. Jis prievine jïenesth tjoerh aktem sjïere tjaatsegem provhkedh maam dongkh Veeljemebyjjesfaamoste, tjïelteste, ambassaadijste jallh konsulaatijste. Jïenestimmiem åadtjoeh ålkoerïjhkeste aaremosth snaltjen 28. biejjien seedtedh. Maahtah ambassaadine jïh konsulaatine jïenestidh aaremosth mïetsken 18. biejjien.
Tjoerh vuesiehtidh datne dïhte
Jis luhpiem åadtjodh jïenestidh tjoerh id-tjaatsegem vuesiehtidh mah stinkestahtah datne dïhte. Jis ih leah dov naan id-tjaatsege akte jeatjah almetje maahta stinkestehtedh datne dïhte, men dellie dïhte almetje tjuara sov id-tjaatsegem vuesiehtidh.
Jis viehkiem daarpesjh gosse jïenestidh
Båvrojne jïenestidh
Maahtah båvrojne jïenestidh jis datne skïemtjes, heaptoe åtnah svïhtjedh jallh dan båeries juktie ih veeljemesijjiem jïjtje jaksh jallh naan sijjiem gusnie åvtelhbodti maahtah jïenestidh. Aaj maahtah båvrojne jïenestidh jis faangkegåetesne jallh jeatjebe kriminaalehoksesijjesne.
Jïenestimmiem aaremosth mïetsken 18. biejjien åådtje öörnedh jïh minngemes veeljemebiejjesne. Datne båvroem daarpesjh jïh aktem væhnam. Gåabpatjahkh edtjijægan 18 jaepien båeries årrodh jïh ij seamma almetje dovne båvrojne jïh væhnine åadtjoeh årrodh.
Datne båvroem daarpesjh – gie maahta båvrojne årrodh?
Båvroe tjuara unnemes 18 jaepien båeries årrodh. Daah almetjh åadtjoeh båvrojne årrodh:
- dov fuelhkeste
- dov såjhtere jallh guhte gie datnem pråvhka dov ieriejgujmie viehkiehtidh
- barkijh faangkegåetine jallh kriminaalehoksesijjesne
- påasteguedtije, jis sijjesne årroeh gusnie laantepåasteguedtije.
Jis båvrojne jïenestidh sjïere tjaatsegh daarpesjh mejtie tjïelteste jallh Veeljemebyjjesfaamoste dongkh. Jis båvrojne åvtelhbodti jïenesth dam dov veeljemekåarhtem daarpesjh.
Gåeteste jïenestidh
Jis datne skïemtjes, dan båeries jallh heaptoe åtnah svïhtjedh jïh ih maehtieh åvtelhbodti jïenestidh jallh veeljemesijjiem jaksh dellie maahtah gåeteste jïenestidh. Gosse naemhtie jïenestidh tjïelte datnem viehkehte guktie gööktesh dov gåajkoe båetiejægan jïh dov jïenestimmiem dåastoejægan. Govlehth dov tjïeltine vielie bïevnesistie.