Till startsidan

Mantaattijako

Ko lääninhallitus oon räknäny valhmiiksi kaikki äänet parttiovälinen mantaattijako pittää alkaa.

Spärrit parttioile

Ette saaja osalistua mantaattijaossa valtiopäivävaahliin ja
Eurooppaparlamenttivaahliin parttio oon häätyny saaja vähhiinthään neljä prosenttia kelpaavista äänistä koko maassa. Jos parttio valtiopäivävaalissa oon saanu vähhiinthään kakstoista prosenttia äänistä vaalikretsissä niin parttio saapii osalistua fasta mantaatitten jakhoon siinä vaalikretsissä.

Maakäräjävaltustovaalissa parttio oon häätyny saaja vähhiinthään kolme prosenttia kelpaavista äänistä koko maakäräjässä ennen ko se saapii osalistua mantaattijakhoon. Kunnanvaltuustovaahliin yks parttio oon häätyny saaja 3 prosenttiä vaalikretsijaetuile kunnile ja 2 prosenttiä ei vaalikretsijaetuile kunnile ette olla matkassa mantaattijaossa.

Mantaattijako parttioitten välissä

Ensinä jaethaan fastat mantaatit ja sitten tasotusmantaatit. Fasta mantaatit jaethaan niitten äänitten perustheela jokka parttiot oon saahneet ittessä kussaki vaalikretsissä.Sitä räknäysmetutia jotako käytethään ette jakkaa fastat mantaatit kuttuthaan ”sovitettu tasatonlukumetuti”.

Vaali Eurooppaparlamenthiin

Vaalissa Eurooppaparlamenthiin kaikki mantaatit oon fastat ja koko maa oon yks vaalikretsi.