Till startsidan

Preliminääri ääniräknäys

Jälkhiin ko äänivasthaanotto oon panttu kiini vaalipäivänä äänivasthaanottajat ittessä kussaki vaalitistriktissä pitävät räknätä net äänet jokka oon otettu vasthaan.

Ennen ko ääniräknäys saapii alkaa net hyväksytyt etukätheisäänet panthaan itheen kuhunki vaaliyyrhnaan.

Sen jälkhiin yyrnat tyihenethään ja äänet ittessä kussaki vaalissa räknäthään.Äänet räknäthään ja sortteerathaan ittele kullekki parttiolle. Ko oon kyse vaalista valtiopäivile, kunnan- ja maakäräjävaltuusthoon niin valtiopäivävaali räknäthään ensinä, sitten kunnanvaltuustovaali ja viimisthään
maakäräjävaltuustovaali.

Ko yks vaalitistrikti vaali-iltana oon räknäny äänet niin tulos soitethaan sisäle raporttivasthaanottajalle joka rekistreeraa tulokset Vaaliviraston vaalitaattasysteehmiin. Sillä laila Vaalivirasto saattaa jo vaali-iltana räknätä ulos preliminäärin vaalituloksen.

Yhtä aikaa ko vaalitistriktitten tulokset rekistreerathaan net tehhään varsin saataviksi meedialle ja ylheisölle Vaaliviraston webbipaikala.

Ko räknäys oon valmis vaaliseetelit panthaan vasituishiin turvalisuuspushiin jokka plompeerathaan kiini ja annethaan vaalilautakunnale. Vaalilautakunta vastaa siittä ette äänet vaalipaikoista niin hoppua ko maholista kuljetethaan lääninhallituksheen.

Vaalilautakunnan preliminääri ääniräknäys

Keskiviikkona vaalipäivän jälkhiin vaalilautakunnat räknäävät net etukätheisäänet jokka vaalipaikat ei ole kerihneet saaja vaalipäiväksi.

Vaalilautakunta saattaa kansa jatkaa tuorestaina jos net ei ole valhmiit keskiviikkona. Se oon ensinki äänet ulkomailta ja etukätheisäänet jokka oon annettu muissa kunnissa vaalipäivänä.Ko vaalilautakunnan räknäys oon valmis netki äänet kuljetethaan lääninhallituksheen.