Till startsidan

Tjaatsestimmielåhkoe

Tjuara tjaatsestimmielåhkosne meatan dellie åådtje tjaatsestidh.

Dah tjaatsestimmielåhkoeh tseegkie fïerhten veeljemen åvteli jïh desnie ajve dah almetjh mah tjaatsestimmiereaktam utnieh daennie veeljemisnie. Tjaatsestimmielåhkoem fïereguhte veeljemedajvese tseegkie jïh veeljemesijjine dejtie nuhtjieh.

Dah gïeh mielieh fiejlie bïevnesh veeljemelåhkosne gååvnesieh tjuerieh dej bïjre tjaaleldh krïevedh dejtie bïevnesidie staeriedidh. Krïevemem tjuara leeneståvrosne seejnemes 12 biejjieh veeljemebiejjien åvteli.

Sveerjen årrojh ålkoelaantesne (ålkoelaantesvïenskh) maehtieh tjaatsestimmielåhkosne meatan jis ålkoelaantese juhtiejin dej seejnemes luhkie jaepiej jallh jis dah seejnemes 30 biejjieh veeljemebiejjien åvteli nåålesamme Skaehtievierhkese dah sijhtieh tjaatsestimmielåhkose tjaalasovvedh. Nåålesimmiem dorje gosse adressebïevnesem Skaehtievierhkese seedtedh. Sjïere tjaatsegem gååvnese ålkoelaantesvïenskide mij sijhtieh tjaatsestimmielåhkose nåålesidh.